KR hefur samið við Aron Sigurðarson og Alex Þór Hauksson, sem báðir eru að koma úr atvinnumennsku. Var fjöldi liða hér heima sem vildi fá þá en KR hafði betur. Þá eru orðrómar á kreiki um að félagið sé alls ekki búið að segja sitt síðasta á leikmannamarkaðnum og fleiri stór nöfn orðuð við það.
Málið var til umræðu í Þungavigtinni en sparkspekingurinn Kristján Óli Sigurðsson kveðst vita hvaða aðilar eru að pumpa fjármagni í rekstur KR.
„Peningarnir eru að koma annars vegar frá Andra Sveinssyni, sem er annar kjölfestufjárfestirinn í Kerecis sem fékk tugi milljarða inn á reikninginn sinn,“ segir hann í nýjasta þættinum. Kerecis var keypt fyrir 180 milljarða íslenskra króna í sumar.
Þess má geta að faðir Andra er Sveinn Jónsson, fyrrum formaður KR og tengingin við félagið því sterk.
„Hinn er Ingi Jóhann Guðmundsson, sem er stærsti eigandi útgerðarfélagsins Gjögurs,“ segir Kristján enn fremur en Ingi er jafnframt, ásamt systur sinni Önnu Guðmundsdóttur, stærsti hluthafi fjárfestingafélagsins Kjálkaness.
Mikael Nikulásson sem er KR-ingur og er sérfræðingur í þættinum tók svo til máls. „Ég veit ekki hvernig þetta virkar, þetta er lið sem hefur ekki verið að borga laun. Sagan segir að KR hafi í langan tíma átt í erfiðleikum með að borga laun. Allt í einu koma tveir til þrír karlar, hvar liggja reglurnar í þessu? Svona getur þú bara keypt fótboltalið,“ sagði Mikael Nikulásson.
KR hafnaði í sjötta sæti Bestu deildar karla á síðasta ári en ætlar sér mun betri hluti í ár. Gregg Ryder tók við þjálfun liðsins í haust af goðsögninni Rúnari Kristinssyni.
