Áhorfendur á leik Middlesbrough og Chelsea í enska deildabikarnum í gær botnuðu ekki í búningavali síðarnefnda liðsins.

Um var að ræða fyrri leik í undanúrslitum. Boro fór með óvæntan sigur af hólmi, 1-0.

Það vakti athygli að Chelsea var í varabúningi sínum þrátt fyrir að ekkert hefði stoppað liðið að vera í sínum hefðbundnu bláu treyjum gegn rauðum Boro-mönnum.

Það sem vakti enn meiri athygli var það að varabúningur Chelsea er ekki allt of frábrugðin aðalbúningnum. Hann er dökkblár á meðan aðalbúningurinn er ljósari.

„Hver er tilgangurinn með þessu?“ skrifaði einn netverji og margir tóku í sama streng.

Seinni leikur Chelsea og Boro fer fram eftir tæpar tvær vikur á Stamford Bridge.

Í hinu undanúrslitaeinvíginu mætast Liverpool og Fulham. Fyrri leikurinn fer fram á Anfield í kvöld.