Lögreglan og leyniþjónustan, sem fara saman með rannsókn málsins, hafa ekki látið mikið uppi um málið en fjölmiðlar hafa velt því upp að málið tengist palestínsku hryðjuverkasamtökunum Hamas. Talsmaður leyniþjónustunnar sagði á fréttamannafundi að sjónir yfirvalda beinist að öryggi samkomustaða gyðinga og öðrum stöðum sem tengjast þeim.
Á fréttamannafundinum kom fram að hin handteknu og eftirlýstu hafi tengsl við skipulögð glæpasamtök, LTF, sem eru bönnuð í Danmörku. Þetta eru glæpasamtök innflytjenda.
Ísraelsk stjórnvöld gengu lengra í yfirlýsingum fyrir helgi og sögðu að hin handteknu hafi „starfað á vegum hryðjuverkasamtakanna Hamas“ og „hafi ætlað að drepa almenna borgara í Evrópu“.
Magnur Ranstorp, sem er einn helsti sérfræðingurinn á Norðurlöndunum í málefnum hryðjuverkasamtaka, hefur fylgst með Hamas árum saman. Í samtali við Jótlandspóstinn sagði hann að það sé ný þróun ef stuðningsfólk Hamas skipuleggi hryðjuverk utan Ísraels en það komi ekki á óvart ef bein tengsl séu á milli Hamas og Danmerkur.
„Hamas er til staðar í Danmörku, Svíþjóð og öðrum norrænum og evrópskum löndum. Þar er fólk sem segist styðja Hamas,“ sagði hann og benti á að fram að þessu hafi tengsl Hamas við Evrópuríki takmarkast við pólitískan og fjárhagslegan stuðning.
Hann benti á að Hamas hafi aldrei framið hryðjuverk í Evrópu og það sé eitthvað algjörlega nýtt ef samtökin gera það en einnig verði að hafa í huga að aldrei fyrr hafi svo hörð átök verið á milli Hamas og Ísraels eins og nú. Það sé því ekki útilokað að Hamas reyni að ráðast á ísraelsk skotmörk utan hefðbundins starfssvæðis síns.
