Nýlega skýrði DV frá verslunarferð Ágústu Kolbrúnar sem fór og verslaði í matinn fyrir fjölskylduna. Vakti fréttin mikla athygli enda verður að segjast að það sem Ágústa Kolbrún fékk fyrir 6.019 krónur var ekki mikið.
Þessi frétt vakti athygli út fyrir landsteinana og fékk DV sendar myndir af innkaupum Íslendings, sem býr í Sønderborg í Danmörku, sem fór að versla í matinn í stórmarkaði þar í bæ á laugardaginn. Er óhætt að segja að hann hafi fengið ansi mikið fyrir þær 20.000 krónur sem hann greiddi fyrir innkaup dagsins, svona að minnsta kosti ef miðað er við það sem Ágústa Kolbrún fékk fyrir 6.000 krónurnar. Útreikningurinn er miðaður við að hver dönsk króna kosti 20 íslenskar.
Innkaupin í Sønderborg kostuðu 1.003 danskar krónur en það svarar til um 20.000 íslenskra króna.
Meðal þess sem var keypt var: (Verðið er gefið upp í íslenskum krónum)
Nautahakk 1kg – 1.500 kr
Rjómi ½ ltr – 99 kr
Jólaöl 0,33 cl – 100 kr
Rauðkál heill haus – 240 kr
Iceberg heill haus – 190 kr
Sýrður rjómi 250gr – 199 kr
Franskbrauð 1kg – 639 kr
3,2 kg af kjúklingabringum – 3.560 kr
Mandarínur 5kg – 600 kr
Grafinn lax 450gr – 1.580 kr
Appelsínur 2kg – 500 kr
Hreint skyr 1kg – 459 kr
Túnfiskur í olíu – 218 kr
Rétt er að hafa í huga að tilboð voru á sumum vörum enda mjög virk samkeppni á danska matvörumarkaðnum. Eitthvað sem sumir segja að vanti algjörlega hér á landi.
Hvað færð þú fyrir 20.000 krónur í matvöruversluninni þinni?
