Heppinn trompmiðaeigandi í Happdrætti Háskólans fékk fimmfaldan fyrsta vinning í aðalútdrættinum í gærkvöldi og fær hann í sinn hlut 25 milljónir króna.

Þetta kemur fram í tilkynningu frá Happdrætti Háskólans.

Þar kemur fram að fjölmargir miðaeigendur fari með milljónir í veskinu inn í jólahátíðina. Fjórir miðaeigendur með sama númer fengu 5 milljónir hver í sinn hlut.

Þá er ekki sagan öll því að Milljónaveltan gekk út og var það annar trompmiðaeigandi sem datt í lukkupottinn þar og fékk 10 milljónir í vinning.

Víkur þá sögunni að þriðja trompmiðaeigandanum sem fékk hálfa milljón í vinning en sem fyrr fimmfaldar trompmiðinn þá upphæð og fékk hann því 2,5 milljónir. Þar fyrir utan fengu sex miðaeigendur eina milljón og átján fengu hálfa milljón.

Í heildina skipta vinningshafar í desember með sér tæpum 168 skattfrjálsum milljónum.

„Happdrætti Háskólans óskar vinningshöfum innilega til hamingju með vinninga sína og óskar landsmönnum öllum gleðilegra jóla og farsæls komandi árs,“ segir í tilkynningunni.