Magnús Ragnarsson, framkvæmdastjóri Símans, vandar Samkeppniseftirlitinu hér á landi ekki kveðjurnar í viðtali við þáttinn Mín Skoðun með Valtý Birni á Brotkast.is. Þar var rætt um réttinn á því að sýna ensku úrvalsdeildina.

Enska úrvalsdeildin gerði nýjan fjögurra ára samning við rétthafa á Bretlandi í gær og má búast við að önnur lönd fylgi. Magnús býst við að útboðið fyrir réttinn á enska boltanum hér á landi verði í september eða október á næsta ári.

„Við vitum ekki hvort það verður þriggja eða sex ára réttur. Síðast ætluðu þeir að bjóða út sex ára rétt á Íslandi en drógu það til baka út af af hótunum samkeppniseftirlitsins á Íslandi,“ segir Magnús ómyrkur í máli.

„Samkeppniseftirlitið er búið að valda töluverðum óróa á sportmarkaði á Íslandi með því að það er algjörlega óljóst hvort og hvenær er heildsölukvöð á sjónvarpsréttina. Það er ekkert sem segir að það sé heildsölukvöð en samkeppniseftirlitið eftir ítrekað hótað að skilgreina til dæmis enska boltann sem sérstakan markað og skilgreina þá að Síminn sé í markaðsráðandi stöðu á þeim markaði og þar með í einokunarstöðu.

Við ætluðum til dæmis ekki að áframselja réttinn til Nova í ár en það var eftir hótanir Samkeppniseftirlitsins sem við ákváðum að gera það áfram.“

Magnús segir réttinn á íþróttum í sjónvarpi hér heima og erlendis í raun einskis virði ef heildsölukvöð er á þeim.

„Þetta getur valdið gríðarlegu uppnámi fyrir KSÍ, eða heldur Íslenskan Toppfótbolta (ÍTF), því ef það er heildsölukvöð á erlendum sjónvarpsréttum, guð minn almáttugur þá ætti hún að vera á innlendum. Ef það er heildsölukvöð á þeim rétti, sem sagt að hver sá sem er með réttinn verður að dreifa honum hjá öllum öðrum, er rétturinn í raun orðinn einskis virði.“

Magnús segir að Samkeppniseftirlitið láti sumt algjörlega í friði en annað ekki.

„Ég fékk fyrst réttinn af enska boltanum 2004 þegar ég var hjá Skjá einum. Fram að þeim tíma hafði Samkeppniseftirlitið aldrei neinar áhyggjur af því að allir sportréttir í heimi væru hjá Sýn. En um leið og Skjár einn eignaðist þennan eina rétt sem var enski boltinn, þá þurfti að setja sérstakar reglur og kvaðir þar af lútandi. Og þegar við unnum þetta aftur 2018 var það í fyrsta skiptið sem að eftirlitið ákveður mögulega að skilgreina enska boltann sem sérstakan markað. Þau hafa ekki fengist til að segja hvort það séu sömu reglur sem gilda um Meistaradeildina, íslenska boltann eða slíkt.

Ég er búinn að standa í miklum bréfaskrifum við eftirlitið og óska eftir leiðbeiningum. En þær eru engar. Einu leiðbeiningarnar sem ég fæ eru: „Prófið að stíga í gildruna og við munum sekta ykkur.“