„Ég skil að umræðuefnið í Dag­mál­um var ekki þetta, en af því að það var verið að reyna að lýsa og skilja per­sónu Krist­ins hefði mátt minn­ast á barn­aníðið með einni setn­ingu að minnsta kosti,“ segir Guðný Bjarnadóttir læknir á eftirlaunum í aðsendri grein í Morgunblaðinu í dag.

Í nóvember 2021 opnaði Guðný sig um kynferðislegt ofbeldi sem hún varð fyrir sem barn af hendi Kristins E. Andréssonar, fyrrverandi þingmanns og ritstjóra Tímarits Máls og Menningar.

Sjá einnig: Guðný segir að Kristinn E. hafi brotið á henni kynferðislega – Skilar skömminni

Guðný stingur niður penna í Morgunblaðið í dag í tilefni viðtals Árna Matthíassonar við Rósu Magnúsdóttur sagnfræðing um bók hennar Kristinn og Þóra: Rauði þræðir í Dagmálum þann 25. september síðastliðinn. Bókin kom út árið 2021 en í kjölfar útgáfunnar steig Guðný fram og lýsti ofbeldinu sem hún varð fyrir.

Í grein sinni í Morgunblaðinu í dag segir Guðný að viðtalið í Dagmálum hafi snúist um þann mikla átrúnað sem Kristinn og Þóra höfðu á Stalín þrátt fyrir fréttir af hans miklu illvirkjum.

„Mér þótti leitt að það skyldi ekki vera minnst einu orði á að Krist­inn var líka ill­virki sem barn­aníðing­ur sbr. grein mína í Mbl. 9. nóv. 2021. Krist­inn áreitti mig end­ur­tekið þegar ég var 9-10 ára og ég reyndi að forðast hann eins og ég gat, níu ára barn. Því miður sagði ég ekki for­eldr­um mín­um frá þessu, viðbrögð mín voru hin dæmi­gerðu viðbrögð fórn­ar­lambs­ins, skömm og þögn.“

Guðný segist hafa skilning á að umræðuefnið í Dagmálum hafi ekki verið þetta, en henni sárnar að ekki hafi verið minnst á barnaníðið einu orði.

„Það eru notuð orð um Krist­in eins og yfirþyrm­andi og drag­bít­ur en ekki barn­aníðing­ur. Á meðan hann þótt­ist vera að berj­ast fyr­ir rétt­læti í heim­in­um vílaði hann ekki fyr­ir sér að reyna að eyðileggja líf barn­ungra dætra vina sinna. Eft­ir að grein mín birt­ist kom fljót­lega önn­ur grein í Mbl. eft­ir konu sem hafði orðið fyr­ir áreiti af hendi Krist­ins barn­ung. Hún var hepp­in, for­eldr­ar henn­ar áttuðu sig á hvað var að ger­ast og hentu Kristni út af heim­il­inu. Einnig hef ég heyrt frá fleiri kon­um sem hafa sömu sögu að segja um Krist­in þegar þær voru börn,“ segir Guðný í grein sinni í dag.

Hún segir að Kristinn hafi verið óheiðarlegur maður, bæði pólitískt og persónulega og grætt á þjónkun sinni við Rússland og síðar Kína.

„Hann bjó flott og lifði hátt en ætlaðist til að hinn grái almúgi sætti sig við lak­ari kjör í nafni sósí­al­ism­ans. Hann nídd­ist á börn­um en lifði á þeim tíma þar sem flest­ir full­orðnir voru blind­ir fyr­ir þessu fyr­ir­bæri og börn­um sem sögðu frá sjaldn­ast trúað. Barnaníð er því miður eitt­hvað sem hef­ur alltaf verið til og hef­ur því miður ekki verið út­rýmt enn þótt nú sé tekið harðar á slíku en áður var gert,“ segir hún að lokum.