Það er svo sannarlega ekki hægt að kenna Sadio Mane um slæmt gengi Bayern Munchen á síðustu leiktíð.
Þetta segir Joshua Kimmich, leikmaður Bayern, en liðið var ekki sannfærandi en vann þó þýska meistaratitilinn mjög naumlega.
Mane gekk í raðir Bayern frá Liverpool í fyrra en hefur nú skrifað undir samning við Al-Nassr í Sádí Arabíu ári seinna.
,,Hann spilaði mjög vel fyrri hluta tímabils og tölfræðin var góð,“ sagði Kimmich í samtali við Bild.
,,Það er ekki hægt að kenna honum einum um það sem gekk ekki upp hjá okkur. Allt fór úrskeiðis fyrir okkur.“
,,Hann var nýr leikmaður sem kom erlendis frá, kynnist nýju tungumáli, nýrri menningu og nýju fólki.“
,,Þegar þú kemur til félags sem stórstjarna þá færðu alltaf mikla gagnrýni – sum gagnrýni á rétt á sér en önnur ekki. Ég get ekki ímyndað mér að það sé auðvelt.“
