Kötturinn Mia kom í leitirnar í nótt, eftir að hafa verið týnd í tæpar þrjár vikur. Mia sem er inniköttur, týndist frá hjólhýsi í Básum í Húsafelli 22. júní. Leit eigenda Míu, Guðjóns Eyrfeld Ólafssonar og Fjólu Berglindar Helgadóttur og auglýsing í fjölmörgum Facebook-hópum bar engan árangur, þar til í nótt. 

„Við fundum Míu í nótt í Kiðárbotnum við viljum þakka öllum fyrir hjálpina við leitina af henni og öll tips. Mikil gleði hérna það eru komnar þrjár vikur síðan hún týndist,“ segir Guðjón í færslu á Facebook.

Guðjón segir í samtali við DV að Mía fari í heilsufarsskoðun á morgun, mánudag, hjá dýralækni.

„Mía er í þokkalegu ástandi, hún er mjög svöng og með tvö sár á bakinu. Ég veit ekki eftir hvað það er eftir gætu verið eftir trágreinar eða annað dýr. Mía er mjög horuð, en vill borða endalaust en hefur ekki pissað ennþá. Hún fer í heilsufarsskoðun á morgun hjá dýralækni.“

Eigendur Míu, Guðjón og Fjóla Berglind Helgadóttir lýstu fyrst eftir Míu þann 22. júní. Leitin bar þó engan árangur og var Míu sárt saknað af eigendum sínum: 

„Nú er Mía okkar búin að vera týnd og ein og hrædd í 14 daga í Húsafellsskógi og ekki komið nein vísbending um að einhver hafi séð hana eða neitt annað.

Við erum komin með miðla að reyna að finna hana og ekkert gengur við erum með fellibúr í láni frá villköttum á Vesturlandi og höfum verið að staðsetja það á nokkrum stöðum um skóginn það hefur ekki komið önnur dýr í búrið einu sinni.

Við erum að verða illa farin af sorg og sökknuði og á sál og líkama. Ef þið þekkið einhvern sem hugsanlega hefur séð til Míu okkar í Húsafellsskógi eða er með miðils hæfileika og getur hjálpað okkur að leita að Míu okkar og verður til þess að hún finnst á lífi verðum við ævilangt þakklát,“ sagði Guðjón í færslu á Facebook 5. júlí.