Síðastliðinn föstudag var maður sakfelldur í Héraðsdómi Reykjaness fyrir brot í nánu sambandi og kynferðisbrot. Hann var meðal annars sakaður um að dreifa kynferðislegu myndefni af kærustu sinni auk þess að beita hana öðru ofbeldi og hótunum.

Um er að ræða fimm ákæruliði og í þeim fyrsta var maðurinn sakaður um að hafa í að minnsta kosti þrjú skipti á árinu 2019 tekið upp og vistað á síma sinn tvö myndskeið og eina ljósmynd af konunni í samförum með honum, án samþykkis og vitneskju hennar.

Í öðru lagi var hinn ákærði sakaður um að hafa sent eiginmanni konunnar myndskeið af henni og sér í samförum í gegnum WhatsApp, án samþykkis konunnar.

Í þriðju ákærulið segir að maðurinn hafi hótað að dreifa 58 kynferðislegum myndskeiðum af konunni.

Í fjórða ákærulið eru manninum gefið að sök líkamlegt og kynferðislegt ofbeldi gegn konunni sem er útlistað svo: „Með því að hafa mánudaginn 6. júlí 2020, í svefnherbergi ákærða á heimili hans að […], veist að Y, klipið hana í kynfærasvæði, tekið um höfuð hennar og í tvígang slegið því í gluggakistu og slegið hana á báðar rasskinnar, allt með þeim afleiðingum að hún hlaut þreifieymsli á kynfærasvæði, aftan á höfði og á báðum rasskinnum.“

Í fimmta lagi var maðurinn ákærður fyrir að hafa sent konunni ítrekað hljóðskilaboð þar sem hann svívirti hana og hótaði henni því að eyðileggja líf hennar.

Maðurinn játaði brot sín skýlaust og var það virt honum til refsilækkunar. Hins vegar er horft til þess að brotin eru alvarleg og hann hefði ógnað heilsu og velferð konunnar.

Var hann dæmdur í sex mánaða fangelsi, þar af þrjá mánuði skilorðsbundið.

Dóminn má lesa hér.