Yevgeny Prigozhin, eigandi Wagner málaliðahópsins, segir að rússneski herinn hafi brugðið fæti fyrir Wagner til að valda málaliðunum tjóni. Wagner hefur nú að sögn dregið málaliða sína frá Bakhmut og látið rússneska hernum bæinn eftir.

Það er ekkert leyndarmál að Prigozhin og Sergei Shoigu, varnarmálaráðherra Rússlands, eru engir vinir. Nú virðast deilur þeirra hafa harðnað enn frekar.

Á meðan á brotthvarfi Wagnerliða frá Bakhmut stóð urðu þeir varir við „grunsamlegar aðgerðir“ og sakar Prigozhin rússneska varnarmálaráðuneytið að hafa staðið á bak við þær.

Hann segir að rússneskir hermenn hafi komið skriðdrekasprengjum og öðrum sprengjum fyrir með fram þeim leiðum sem Wagnerliðar notuðu við brottför sína frá Bakhmut.

Í færslu á Telegram sagði hann að ganga megi út frá því að þessar sprengjur hafi verið ætlaðar Wagnerliðum.