Maður um fimmtugt er nú, samkvæmt heimildum DV, til rannsóknar hjá lögreglunni á Norðurlandi eystra, á Akureyri, fyrir ítrekuð kynferðisbrot gegn börnum.

Í febrúar var gerð húsleit hjá manninum vegna gruns um vörslu barnaníðsefnis. Að sögn viðmælanda DV fannst mikið magn barnaníðsefnis við húsleitina.

Maðurinn er síðan sakaður um að hafa, um tveimur vikum síðar, brotið gegn að minnsta kosti þremur stelpum á aldrinum 10 til 11 ára á heimili á Akureyri þar sem hann var gestkomandi. Faðir einnar stúlkunnar lýsir brotunum þannig fyrir DV að maðurinn hafi fengið stúlkurnar til að afklæðast að hluta. Hann hafi strokið þeim um lærin, krotað á líkama þeirra og sett nuddtæki á þær utanklæða. Hafi hann farið með nuddtækið upp að klofi sumra þeirra.

Meint brot gegn stúlkunum áttu sér stað í marsmánuði en uppgötvuðust fyrir aðeins örfáum dögum. Ein stúlkan mætti manninum þá á almannafæri, brotnaði niður og sagði frá ofbeldinu.

Maðurinn sem ræddi við DV segir að í kjölfarið hafi dóttir hans opnað sig um ofbeldi hins grunaða. Honum er mikið niðri fyrir vegna brotanna og vill að maðurinn verði stöðvaður. „Mér finnst líka mikilvægt að foreldrar fræði börn sín um sín einkasvæði og það að setja mörk,“ segir hann.

Hann bendir á að meintur brotamaður búi í nágrenni við börnin og þau geti átt á hættu að rekast á hann á förnum vegi hvenær sem er.

Hann hefur áhyggjur af því að rannsóknin geti dregist því maðurinn sé hættulegur börnum:

„Svona menn eiga ekki að fá að ganga lausir sama hvað. Ef lögregla vinnur þetta ekki hratt þá fer almúginn að vinna vinnuna því svona menn eiga ekki að ganga lausir og hafa aðgang að börnum! Þú veist ekki hvernig svona einstaklingar hugsa og framkvæma! Ég vil þennan mann úr umferð strax!“