Nú er verið að telja upp úr kössunum í tyrknesku forsetakosningunum þar sem frambjóðandinn Kemal Kilicdaroglu freistar þess að velta sitjandi forseta Recep Tayyip Erdogan úr sessi. Erdogan hefur setið tvö kjörtímabil í valdastóli og stefnir nú á hið þriðja, fyrstur manna.

Samkvæmt fyrstu tölum er Erdogan með forystu með 52% atkvæða gegn 42% síns helsta keppinautar. Það er þó til marks um þá spennu sem verið hefur í aðdraganda kosninganna að Kilicdaroglu fullyrðir að hann sé með forystuna enda komi tölurnar frá ríkismiðlum sem séu hliðhollir forsetanum. Áhugavert verður að fylgjast með hver niðurstaðan verður en líklegt verður að teljast að einhverjir eftirmálar verða.

Spennunnar hefur ekki síður verið vart á samfélagsmiðlum eins og Twitter sem hefur verið vettvangur fyrir kosningaáróður frá báðum fylkingum.

Blaðamaður Michael Yglesias birti í gær tíst þar sem að hann sakaði Elon Musk um að hafa skrúfað fyrir tiltekna umræðu um tyrknesku kosningarnar að beiðni Erdogan og stjórnar hans. Höfðu áður komið fram ásakanir um að tyrkneska stjórninn hafi hótað því að loka á Twitter í heild sinni fyrir Tyrki og það hefði þýtt tekjutap fyrir Twitter.

Óhætt er að fullyrða að Musk hafi tekið þessum ásökunum óstinnt upp en hann svaraði því einfaldlega með orðunum „Datt heilinn á þér út, Yglesias?“. Sagði auðkýfingurinn umdeildi svo að valkosturinn hafi verið sá að Twitter hreinlega myndi flæða yfir með tyrkneskum kosningaáróðri og því hafi eina leiðin í stöðunni verið sú að takmarka ákveðin tíst tímabundið.

Did your brain fall out of your head, Yglesias? The choice is have Twitter throttled in its entirety or limit access to some tweets. Which one do you want?

— Elon Musk (@elonmusk) May 13, 2023

Viðbrögð Musk og ekki síður sú staðreynd að lokað hafi verið á ákveðin tíst á Twitter varð til þess að auðkýfingurinn fékk yfir sig gusu af ásökunum um að hann væri hræsnari sem sem flaggaði áhuga sínum á tjáningafrelsinu aðeins eftir eigin hentisemi.

„Sú staðreynd að Elon Musk telur það augljóslega betra að birta aðeins það sem einræðisherra vill frekar en að birta ekki neitt segir þér allt sem þú þarft að vita um Elon Musk,“ skrifaði Christopher Orr, pistlahöfundur í New York Times.