Erling Haaland væri líklega að spila fyrir Manchester United í dag ef félagið hefði hlustað á Ole Gunnar Solskjær á sínum tíma.

Solskjær er fyrrum leikmaður Man Utd sem og þjálfari liðsins en hann ráðlagði félaginu að kaupa Erling Haaland frá Molde á sínum tíma.

Haaland er í dag einn besti ef ekki besti framherji heims en hann vann með Solskjær hjá Molde í Noregi.

Man Utd gat keypt leikmanninn fyrir um fjórar milljónir punda en hann fór þess í stað til RB Salzburg, svo Dortmund og síðast Manchester City.

,,Ég hringdi í Manchester United sex mánuðum áður en ég tók við og sagði þeim frá þessum framherja, þessum strák Haaland sem við vorum með en þeir hlustuðu ekki,“ sagði Solskjær.

,,Ég bað um fjórar milljónir punda fyrir Erling en þeir ákváðu að kaupa hann ekki.“