Íslenski landsliðsmaðurinn, Björn Bergmann Sigurðarson gekk í raðir ÍA undir lok félagaskiptagluggans í apríl. Óvíst er hins vegar hvenær hann getur hjálpað liðinu innan vallar.
Björn Bergmann var samningsbundinn Molde í Noregi en meiðsli hafa gert honum verulega erfitt fyrir síðustu.
„Í sjálfu sér ekki, hann fór í aðgerð í desember og er bara að byrja sína endurhæfingu. Það veit það enginn,“ sagði Jón Þór Hauksson, þjálfari ÍA, í hlaðvarpsþætti 433.is um Lengjudeildina í gær.
Björn sem ólst upp hjá ÍA er 32 ára gamall og hefur tekið ákvörðun um að flytja á Akranes með fjölskyldu sína.
„Það ríkir bjartsýni eftir þá aðgerð að hann geti yfirhöfuð spilað knattspyrnu aftur, við erum ekkert nær með það. Hann er að byggja sig upp og er í endurhæfingu,“ segir Jón Þór.
„Það getur enginn sagt til um það núna hvað muni gerast í því. Við vitum að hann er að flytja á Akranes með sína fjölskyldu, við erum ánægðir með að hann hafi skipt yfir í okkar félag.“
Jón segir að Björn muni alltaf hjálpa til sama hvort það sé með þekkingu sinni innan eða utan vallar. Björn var hluti af HM hópi Íslands árið 2018.
„Hann vill hjálpa til í þessu verkefni, sama hvort það sé innan eða utan vallar. Það er risastór fengur í því fyrir okkur.“
Hlaðvarpsþáttinn má heyra í heild á Spotify og í öllum helstu hlaðvarpsveitum.
