Sparkspekingurinn og fyrrum knattspyrnumaðurinn Micah Richards hrósar Martin Ödegaard, fyrirliða Arsenal, í hástert í nýjum pistli sínum. Hann segist þó vorkenna leikmanninum af einni ástæðu.

Ödegaard hefur verið stórkostlegur undanfarið. Í gær skoraði hann fyrra mark Arsenal í 0-2 sigri á Newcastle. Liðið á enn veika von um að hampa Englandsmeistaratitilinn.

„Það er skrýtið að vorkenna einhverjum sem þú varst að horfa á lýsa upp sunnudaginn þinn en þannig er það með Ödegaard. Ef það væri ekki fyrir Erling Haaland væri Ödegaard líklega valinn leikmaður tímabilsins,“ skrifar Richards.

Norðmaðurinn minnir Richards á fyrrum liðsfélaga sinn hjá Manchester City.

„Hann minnir mig á David Silva á svo marga vegu. Hann er hljóðlátur leiðtogi. Stundum vissir þú ekki af David í herberginu. En á vellinum lét hann alla fylgja sér með snilli sinni. Það er það sem Ödegaard er að gera. Að skora 15 mörk sem miðjumaður er bara stórkostlegt.

Einu sinni þurftir þú að vera háværastur eða stærsti persónuleikinn til að vera fyrirliði. Það hefur allt breyst. Steven Gerrard öskraði ekki sem landsliðsfyrirliði en þú horfðir á hann og heillaðist.“

Ödegaard gekk endanlega í raðir Arsenal frá Real Madrid sumarið 2021 eftir að hafa fengið hann á láni fyrr á því ári.

„Viðskipti Arsenal, að fá Ödegaard á láni, bæta sjálfstraust hans og kaupa hann svo voru meistaraverk. Hann á bara eftir að verða betri.“