Kolo Toure býst ekki við því að Sadio Mane snúi aftur til Liverpool í sumar. Kappinn hefur verið orðaður frá Bayern Munchen.
Senegalinn fór frá Liverpool til Bayern í sumar eftir sex ár á Anfield. Á tíma sínum þar skoraði kappinn 120 mörk og vann titla eins og ensku úrvalsdeildina og Meistaradeild Evrópu.
Það hefur hins vegar ekki gengið vel hjá Bayern og á dögunum fór allt í háaloft þega Mane slóst við liðsfélaga sinn Leroy Sane eftir leik.
Í kjölfarið hefur Mane verið orðaður við brottför, til að mynda aftur til Liverpool.
Toure, sem er fyrrum leikmaður Liverpool, telur það hins vegar ólíklegt.
„Ég held að það hafi verið stórt högg að missa Mane. Mane var að mínu mati sérstakur leikmaður fyrir Liverpool því hann getur skorað mörk og búið þau til, auk þess sem hann er stór karakter. Þegar það var erfitt gat hann gert gæfumuninn,“ segir hann.
„Ég held samt að þeir séu að leita að nýrri útgáfu af Liverpool. Jurgen vill fríska upp á liðið sitt og leita að leikmönnum sem passa vel inn. Ég er viss um að honum takist það.“
