Dimitar Berbatov, fyrrum leikmaður Manchester United, hefur tjáð sig um dramatískan viðskilnað félagsins við Cristiano Ronaldo í vetur.
Ronaldo sneri aftur til United sumarið 2021 sem hetja en var ekki sáttur með sitt hlutverk undir stjórn Erik ten Hag á þessari leiktíð. Portúgalinn yfirgaf félagið eftir svakalegt viðtal við Piers Morgan undir lok síðasta árs.
„Það voru ekki mistök að fá hann því á fyrra tímabilinu skoraði hann mikið af mörkum. Þetta snerist miklu frekar um misskilning, samskiptaerfiðleika og virðingarleysi af hálfu beggja aðila.
Þegar þú ert með einhvern eins og Ronaldo, lifandi goðsögn í leiknum, verður þú að sýna þeim virðingu.“
Berbatov segir að United hafi ekki komið nógu vel fram við Ronaldo.
„Þú verður að tala við hann daglega. Ef hann spilar ekki þarftu að útskýra fyrir honum af hverju. Honum þarf að líða eins og hann sé sérstakur því hann er það.
Hann er leikmaður sem hefur unnið sér inn ákeðna virðingu innan fótboltaheimsins. Þegar þú áttar þig ekki á þessu gerast svona hlutir.“
