Manchester United goðsögnin Rio Ferdinand viðurkennir að hann hafi stundum farið illa með Cristiano Ronaldo á æfingasvæðinu þegar sá síðarnefndi var að stíga sín fyrstu skref með Rauðu djöflunum.
Portúgalinn kom til Manchester 18 ára gamall frá heimalandinu. Hann kom inn í búningsklefa með goðsögnum og segir Ferdinand það hafa komið í hlut reynslumeiri leikmanna að gera Ronaldo kláran í ensku úrvalsdeildina og hörkuna sem henni fylgir.
„Ég og Quinton Fortune stríddum honum mikið. Hann var miklu yngri en við. Stundum var þetta kannski hreint og beint einelti en við vorum að reyna að byggja hann upp.“
Þá segir Ferdinand að hann hafi oft farið illa með Ronaldo í borðtennis.
„Við spiluðum oft fyrir æfingar sem hluti af upphitun. Ég rústaði honum. Hann sigraði mig líka. Við vorum númer eitt og tvö, eins og Federer og Nadal. Ef þessu hefði verið sjónvarpað hefðu met verið slegin. Hann grét stundum næstum því, með svo mikið keppnisskap.“
Ronaldo vann þrjá Englandsmeistaratitla og Meistaradeild Evrópu áður en hann fór frá United til Real Madrid árið 2009 fyrir 80 milljónir punda, þá metfé.
