Þegar Abdulrahimzai kom til Bretlands árið 2019 og sótti um hæli hélt hann því fram að hann væri 14 ára. Hann var því meðhöndlaður sem barn og var komið fyrir hjá fósturfjölskyldu.
En hann laug til um aldur sinn. Hann var 18 ára. Í mars 2022 myrti hann Tom Roberts, 21 árs hermann, eftir rifrildi um rafskútu í Bournemouth. Í janúar var hann dæmdur í að minnsta kosti 29 ára fangelsi.
Innanríkisráðuneytið heldur því ekki fram að allir hælisleitendur, sem ljúga til um aldur sinn, séu glæpamenn. En samantekt frá ráðuneytinu sýnir að í helmingi 7.900 mála frá 2016 til 2022, þar sem deilt var um aldur hælisleitenda, var um fullorðna að ræða.
Nú er hvatinn til að ljúga til um aldur sinn orðinn jafnvel enn meiri en áður því þeir sem eru 18 ára og eldri, og koma einir til Bretlands, eiga á hættu að vera verða sendir til Rúanda. Þetta er liður í aðgerðum Breta til að reyna að fæla fólk frá að leggja í lífshættulega för yfir Ermarsund.
The Times segir að nú ætli ráðuneytið að beita vísindalegum aðferðum til að koma upp um þá sem ljúga til um aldur sinn, meðal annars til að koma í veg fyrir að fullorðnir séu látnir stunda nám í barnaskólum eða sé komið fyrir hjá fósturfjölskyldum.
Í vafatilfellum verða hælisleitendur því sendir í skanna, MR-skanna. Myndir verða teknar af hnjám og viðbeini og röntgenmyndir verða teknar af endajöxlum, úlnliðum og höndum til að leggja mat á raunverulegan aldur hælisleitenda.
Hælisleitendur eru í langflestum tilvikum ekki með skilríki meðferðis þegar þeir koma til Bretlands og því getur verið erfitt að sannreyna aldur þeirra. The Times skýrir meðal annars frá máli manns, sem kom yfir Ermarsund, og sagðist vera 16 ára. Yfirvöld töldu hann vera 21 árs. Ítarleg læknisfræðileg rannsókn leiddi í ljós að hann var 26 ára og í ljós kom að hann hafði búið í öðru Evrópuríki í fimm ár áður en hann kom til Bretlands.
