Knattspyrnumaðurinn Achraf Hakimi, sem er á mála hjá Paris Saint-Germain, er til rannsóknar vegna meintrar nauðgunar á laugardaginn síðastliðinn. Franskir saksóknarar rannsaka meint brot hans.

Hinn 24 ára gamli Hakimi á að hafa boðið konu heim til sín um helgina. Eiginkona hans og börn eru stödd í fríi í Dúbaí. Þar er hann sakaður um að hafa brotið á konunni, sem er 23 ára gömul.

Meintur þolandi leitaði til lögreglu og lét vita af atvikinu en hún vildi ekki leggja fram kæru. Saksóknarar ákváðu samt að hefja rannsókn á málinu sökum alvarleika meintra brota Hakimi og stöðu hans í samfélaginu, en hann er heimsfrægur knattspyrnumaður.

Samkvæmt Le Parisien setti Hakimi sig fyrst í samband við meintan þolanda þann 16. janúar í gegnum Instagram. Hann bauð henni svo á heimili sitt á laugardag og sendi bíl á eftir henni.

Meintur þolandi segir að eftir að hún hafi komið heim til hans hafi hann farið að kyssa hana á munninn og lyft fötum hennar. Hann hafi síðan kysst á henni brjóstin þrátt fyrir mótmæli af hennar hálfu. Að lokum á Hakimi að hafa átt við hana samfarir gegn hennar vilja.

Konan sagði lögreglu að hún hafi náð að losna frá Hakimi með því að sparka í hann, áður en hún hafði samband við vin sem náði í hana.

Hakimi hefur ekki brugðist við ásökununum.

Hann hitti eiginkonu sína, Hibu, árið 2018 þegar hann var á mála hjá Dortmund. Þau giftu sig árið 2020 og eiga saman tvo syni.

Hakimi var staddur á verðlaunahátíð FIFA í gær. Þar var hann valinn í lið ársins.