Framtíð Lionel Messi er í óvissu um þessar mundir.

Samningur þessa 35 ára gamla knattspyrnusnillings við Paris Saint-Germain rennur út í sumar. Félagið vill framlengja við hann en samkvæmt fréttum er Messi óviss um framtíð sína í borg ástarinnar.

Inter Miami í Bandaríkjunum horfir til þess að nýta sér óvissuna og lokka Messi til sín.

Argentínumaðurinn hefur verið lengi á blaði Inter Miami, sem er í eigu knattspyrnugoðsagnarinnar David Beckham.

Ekki skemmir fyrir að Messi og fjölskylda hans eru talin mjög hrifin af þeirri hugmynd að búa í Bandaríkjunum.

Þar spilar inn í sú ástæða að þau eiga þegar glæsilegt heimili þar. Þau eyða þar reglulega tíma í fríinu.