Rannsóknin miðar að því að fá á hreint hvort skipulögð glæpasamtök standi á bak við straum barnshafandi rússneskra kvenna til landsins. Á síðustu mánuðum hafa rúmlega 5.000 rússneskar konur komið til landsins til að eignast börn sín. Ástæðan er að þær vilja að börnin fái argentínskan ríkisborgararétt og þar með argentínskt vegabréf. La Nacion skýrir frá þessu og hefur eftir heimildarmönnum innan stjórnkerfisins.
Börn sem fæðast í Argentínu fá sjálfkrafa ríkisborgararétt.
Lögreglan er sögð hafa fundið tölvur, farsíma, ferðaskjöl og reiðufé við húsleitir í auðmannahverfinu Puerto Madero í Buenos Aires. Er þetta talið tengjast samtökum sem aðstoða fólk við að komast til landsins.
Florencia Carignano, yfirmaður innflytjendaeftirlitsins, segir að hér sé um stóran iðnað að ræða þar sem háar fjárhæðir séu undir. Hún sagði að á föstudaginn hafi 83 rússneskar konur komið til Buenos Aires, 16 eru barnshafandi.
Á síðasta ári komu 5.800 barnshafandi rússneskar konur til Argentínu.
Foreldrar barns, sem er með argentínskan ríkisborgararétt, fá frekar auðveldlega argentínskan ríkisborgararétt. Argentínsk vegabréf eru eftirsótt af Rússum því þau veita ferðaheimild, án áritunar, til rúmlega 160 landa. Með rússnesku vegabréfi er aðeins hægt að ferðast til 71 lands án áritunar.
