Ingólfur Kjartansson, sem er tvítugur að aldri, var í nóvember árið 2022 dæmdur í átta ára fangelsi fyrir skotárás sem átti sér stað í bílastæðahúsi við Bergstaðastræti þann 13. febrúar, sama ár.

Vísir greinir frá en dómur í málinu hefur ekki verið birtur. DV hefur sent fyrirspurn á Héraðsdóm Reykjavíkur um hverju það sæti að dómur í málinu hafi ekki verið birtur.

Ingólfur beitti þrívíddarprentaðri byssu í árásinni og skaut mann á brjóstkassa hægra megin, rétt fyrir ofan geirvörtu. Skotið fór í gegnum hægra lunga og hlaut brotaþoli opið sár á brjóstkassa, áverkablæðingu í brjósthol, rifbrot og áverkaloftbrjóst. (Sjá Vísir.is)

Árásin vakti mikinn óhug enda skotárásir af þessu tagi fátíðar hér á landi. Fréttablaðið ræddi við sjónarvott, íbúa í hverfinu, sem vaknaði við skothvelli, leit út um glugga sem snýr í átt að bílastæðahúsinu og sá karlmann, Ingólf, munda byssuna:

„Í fyrstu hélt ég að þetta væru flugeldar. Fólk hefur verið að skjóta þeim upp hérna í hverfinu. En hvellirnir virtust vera svolítið taktfastir, fjögur eða fimm skot. Þá leit ég út um gluggann og sá mann með vélbyssu á þaki bílastæðahússins. Ég alla vega held að þetta hafi verið vélbyssa. Þetta var stór byssa sem hann hélt á með báðum höndum. Þetta var óhugnanlegt. Ég var eðlilega hræddur enda er maður ekki vanur að sjá mann með vélbyssu.“

Sjónarvotturinn hringdi í lögreglu sem mætti á vettvang skömmu síðar ásamt sérsveit lögreglu. Var svæðið girt af og lokað fyrir aðgang að bílastæðahúsinu.

Þrír menn voru handteknir vegna árásarinnar en skotmaðurinn sjálfur, Ingólfur Kjartansson, var sem fyrr segir sakfelldur og dæmdur í átta ára fangelsi fyrir tilraun til manndráps. Árið 2021 hlaut hann tveggja ára fangelsisdóm fyrir brot gegn barnaverndarlögum, líkamsárás og rán, ásamt vopnalaga- og fíkniefnalagabrotum. Engu að síður gekk hann laus þann 13. febrúar árið 2022 og framdi þetta brot.