Jesse Lingard fór í viðtal nýlega þar sem hann gagnrýndi sitt fyrrum félag, Manchester United.

Lingard er uppalinn hjá félaginu en fór til Nottingham Forest á frjálsri sölu í sumar.

Á meðal þess sem hann segir frá í viðtalinu eru samskipti hans við yfirmann fótboltamála hjá United, John Murtough, fyrir ári síðan. Þá vildi Lingard komast burt á láni þar sem hann var ekki að spila.

Lingard vill meina að hann hafi nánast verið kominn til Newcastle á láni þegar Murtough hringdi og sagði að hann gæti ekki farið.

„Þeir leyfðu nokkrum leikmönnum að fara á láni en þegar kom að mér hringdi John Murtough og sagði: Þú ert ekki að fara út á lán,“ segir Lingard.

„Ég sagði honum: Þessi er að fara á lán. Leyfðu mér að fara og njóta fótboltans því ég er ekki að spila hér. Hann spurði mig hvort ég vildi nokkurra daga frí. Ég sagði nei því mig langaði að fara og spila fótbolta.

Þeir komu í veg fyrir að ég færi á láni. Ég var pirraður og sendi honum: Bara af því þú sagðir þetta með fríið ætla ég að taka tveggja daga frí.“

Opinber ummæli yfirmanna United pirruðu svo Lingard.

„Svo settu þeir út yfirlýsinguna: Jesse bað um tveggja daga frí. Ég fór beint á Twitter og sagði hvernig hlutirnir væru í raun og veru.“