Senaida Marie Soto, 23 ára gömul kona frá Texas í Bandaríkjunum, var handtekin á dögunum en hún er grunuð um að hafa kveikt í húsi kærasta síns þegar hún var í bræðiskasti. Soto er sögð hafa orðið brjáluð er kona svaraði henni þegar hún hringdi í kærastann sinn, var Soto þá sannfærð um að hann væri að halda framhjá henni.

Soto hafði því kveikt í húsinu til að hefna framhjáhaldsins en síðar kom í ljós að ekki var um neitt framhjáhald að ræða. Konan sem hafði svarað í síma kærastans var ekki að rugla saman reitum með honum þar sem hún er ættingi hans.

Í yfirlýsingu frá skýrslu fógetans í Bexar, sýslunni sem þau búa í, kemur fram að Soto hafi kveikt í sófa í stofu kærastans síns. „Á meðan hún kveikti í húsinu tók hún upp myndband og í því sást að hún kveikti í sófanum, eldurinn dreifði sér svo og olli því að húsið varð alelda,“ segir í yfirlýsingunni. Þá segir einnig að kostnaðurinn við skemmdirnar sem urðu vegna vegna eldsins séu um 50 þúsund dalir, það jafngildir um 7 milljónum í íslenskum krónum.

Soto er þá einnig sögð hafa sent kærastanum sínum skilaboð á meðan húsið brann. „Ég vona að það sé í lagi með húsið þitt,“ er hún sögð hafa sagt í skilaboðunum.