Kona fædd árið 1982 hefur verið sakfelld fyrir tvær líkamsárásir. Dómur yfir henni var kveðinn upp í Héraðsdómi Reykjavíkur þann 17. október.
Í báðum tilvikum var um að ræða ruddalegar árásir á starfsfólk ótilgreindra vinnustaða.
Fyrri árásin var á ótilteknum stað í Reykjavík, innandyra, þar sem konan var sökuð um að hafa slegið starfsmann með krepptum hnefa vinstra megin í andlitið með þeim afleiðingum að starfsmaðurinn hlaut bólgu fyrir miðri kinn og niður á kjálkabarð og mar í andliti vinstra megin. Gerðist þetta þann 8. febrúar árið 2021.
Hitt atvikið átti sér stað þann 20. febrúar 2021, einnig innandyra á ótilteknum stað. Konan er sögð hafa veist með ofbeldi að kvenkynsstarfsmanni, tekið konuna kverkataki, klórað hana á hálsi og rifið af henni hálsmen, allt með þeim afleiðingum að konan hlaut roðafláka og yfirborðsáverka á hálsi.
Konan játaði brot sín skýlaust. Hún hefur áður gerst brotleg við lög, framið meðal annars fíkniefnabrot og umferðarlagabrot. Við ákvörðun refsingar var litið til þess að árásir beindust að lífi og heilsu brotaþola sem voru að sinna starfi sínu þegar atvikin gerðust.
Konan fékk engu að síður mjög vægan dóm, 30 daga skilorðsbundið fangelsi. Hún þarf að greiða um 400 þúsund krónur málskostnað.
