Það verður skoskt dómarateymi sem dæmir leik Víkings Reykjavíkur og Malmö.
Um síðari leik liðanna í fyrstu umferð undankeppni Meistaradeildar Evrópu er að ræða. Hann fer fram hér heima annað kvöld.
Aðaldómari verður John Beaton. Aðstoðardómarar verða Daniel McFarlane og Douglas Potter. Loks verður David Dickinson fjórði dómari.
Fyrri leik liðanna lauk með 3-2 sigri Malmö. Lærisveinar Arnars Gunnlaugssonar í Víkingi spiluðu þó frábærlega í leiknum.
Kristall Máni Ingason hlaut afar umdeilda brottvísun eftir að hafa skorað fyrsta mark Víkings seint í fyrri hálfleik. Hann fékk þá sitt seinna gula spjald fyrir að „sussa“ á stuðningsmenn Malmö.
Leikurinn á morgun fer fram klukkan 19:30 og verður spilaður í Víkinni.
