Robert Crimo, faðir ódæðismannsins Robert Crimo III., segist ekki sjá eftir því að hafa aðstoðað son sinn við að komast yfir skotvopn. Faðirinn ábyrgðist umsókn sonarins um sérstakt leyfi til að kaupa skotvopn árið 2019 en þá var ódæðismaðurinn yngri en 21 árs gamall. Þegar leyfið var komið í höfn notaði morðinginn það til þess að fjárfesta í byssum sem hann síðar notaði í skotárásinni við Highland Park. Þar létust sjö einstaklingar og á þriðja tug særðist.
Sonurinn hefði ekki getað keypt byssu án leyfisins en þrátt fyror það segir faðirinn að hann sjái ekki eftir neinu.
„Sé ég eftir því? Nei, ég sé ekki eftir því að hafa undirritað leyfisbeiðnina fyrir þremur árum. Það var það eina sem ég gerði. Ef ég hefði kept sjálfur byssur í gegnum árið á mínu nafni og gefið honum aðgang að þeim, þá væri ég á öðru máli. En hann [sonurinn] fór alveg sjálfur í gegnum það ferli,“ sagði Crimo eldri í viðtali við ABC News.
Lögregluyfirvöld ytra hefur gefið það út að rannsakað verður hvort að Crimo eldri beri að einhverju leyti ábyrgð á ódæðisverki sonarins með því að hafa stutt byssuleyfisumsókn hans. Verði hann ekki ákærður er ekki ólíklegt að ættingjar fórnarlambanna í Highland Park muni höfða einkamál gegn honum.
Fjölmiðlar ytra hafa greint frá því að Crimo eldri, sem tapaði naumlega kosningum um bæjarstjórastöðu Highland Park árið 2019, hafi undirritað byssuleyfisumsóknina þrátt fyrir að sonur hans hafi hótað að drepa alla fjölskyldumeðlimi sína skömmu áður. Þessu hefur Crimo eldri neitað og segir málið tekið úr samhengi.
„Þetta var bara barn í tilfinningalegu uppnámi. Ég veit ekki yfir hverju hann var æstur en systir hans hringdi á lögregluna. Ég bjó ekki á heimilinu á þessum tíma,“ sagði Crimo eldri.
Lögreglan gerði meðal annars 16 hnífa og sverð upptækt í útkallinu en Crimo yngri sagði lögreglunni að hann safnaði vopnum. Hann var ekki kærður vegna málsins.
