Margrét Erla Maack, fjölmiðlakona, veislustjóri, magadansmær, danskennari og margt fleira, deildi fyrir 11 árum síðan ansi skemmtilegri mynd af Sigmari Guðmundssyni, alþingismanni Viðreisnar. Þegar myndin var tekin var Sigmar þó ekki orðinn alþingismaður heldur var hann frétta- og dagskrárgerðarmaður á RÚV eða eins og Margrét orðar það í gríni: „bara óprúttinn sjónvarpsmaður“.

Á myndinni má sjá Sigmar fylgja tískubylgju sem tröllréð öllu um mitt árið 2011, það að planka. Tískubylgjan lýsti sér í því að fólk tók upp á því að liggja flatt á hinum ýmsu óvenjulegu stöðum, eins og píanói í tilviki Sigmars.

„Maðurinn er náttúrulega orðinn létt óþolandi,“ sagði Margrét þegar hún birti myndina árið 2011 en í gær skrifaði hún nýja athugasemd við færsluna þar sem liðin voru slétt 11 ár frá birtingu hennar.

„Hver man ekki eftir þessu tímabili alþingismannsins þegar hann var bara óprúttinn sjónvarpsmaður sem var alltaf að planka í partýum?“ spyr Margrét í þessari nýju athugasemd og uppskar nokkur hlátrasköll miðað við viðbrögð vina hennar á samfélagsmiðlinum.

Myndina sem um ræðir má sjá hér fyrir neðan: