Það gengur mjög erfiðlega hjá Manchester United að finna félag sem vill kaupa Anthony Martial þrátt fyrir útsöluverð félagsins.
United borgaði upphaflega 38,5 milljónir punda fyrir Martial árið 2015 en félagið vill 20 milljónir punda fyrir hann í dag.
Vandamálið er hins vegar það að Martial er með 240 þúsund pund í laun á viku og á tvö ár eftir af þeim samningi. Ekkert félag vill borga franska framherjanum það.
Martial hefur átt erfiða tíma hjá United undanfarið og fór á láni til Sevilla í janúar en fann sig ekki. Óvíst er hvort Martial fari í sumar.
United vill einnig selja Eric Bailly en varnarmaðurinn á einnig tvö ár eftir af samningi. United vill 8,5 milljón punda fyrir Bailly sem kostaði félagið 30 milljónir punda árið 2016.
Bailly hefur verið mikið meiddur og hefur aðeins spilað 45 deildarleiki á síðustu fimm tímabilum.
Þá er Andreas Perreira einnig til sölu en hann var á láni hjá Flamengo á liðnu tímabili en er ekki í plönum Erik ten Hag sem tók við United í sumar.
