Erlendur ríkisborgari sem undanfarið hefur búið á Akureyri hefur verið úrskurðaður í farbann til 29. júní. Landsréttur staðfesti í gær úrskurð Héraðsdóms Norðurlands eystra, en maðurinn áfrýjaði þeim úrskurði til Landsréttar.

Farbannskrafan er meðal annars rökstudd með því að maðurinn sé erlendur ríkisborgari og hafi engin bein tengsl við landið, hvorki atvinnu né fjölskyldutengsl. Enn fremur er vísað til alvarleika þeirra brota sem maðurinn er grunaður um.

Maðurinn er sagður hafa brotið kynferðislega gegn tveimur konum á skemmtistað á Akureyri þann 29. maí síðastliðinn. Í úrskurði héraðdóms er atvikum lýst svo:

„Lögregla kveður vitni hafa sagt að stúlka hafi komið hágrátandi niður á bar með fötin hálf niður um sig og sagt að maður hafi tekið niður um hana, farið með hana afsíðis og tekið getnaðarlim sinn út. Hún hafi náð að forða sér frá honum, farið niður að barnum, rætt við vitni og getað vísað á manninn. Maðurinn hafi séð að verið væri að benda á sig og reynt að hlaupa af vettvangi.

Brotaþolinn A hafi skýrt lögreglu frá því að erlendur maður með derhúfu og skegg hafi dregið hana framhjá barnum, bakvið tjöld á efri hæðinni. Þar hafi hann byrjað að kyssa hana en hún reynt að snúa andliti sínu frá honum. Því næst hafi hann dregið niður um sig buxurnar og vitnið séð getnaðarlim hans. Hann hafi svo ítrekað að komast undir pilsið hennar. Þá hafi hann einnig reynt að fara inn í hana með getnaðarlim sinn en hún náð að ýta honum frá. Brotaþoli hafi sagt að hann hafi komið við kynfæri hennar þegar hann reyndi að setja getnaðarlim sinn inn í hana. Hún hafi að lokum náð að koma sér í burtu frá honum.

Brotaþolinn B hafi skýrt lögreglu frá því að sami maður hafi kysst hana án samþykkis og káfað á henni í hennar óþökk.“

Úrskurði héraðsdóms og Landsréttar í málinu má lesa hér.