Héraðsdómur Reykjavíkur hefur dæmt íslenska ríkið til þess að greiða karlmanni 1,5 milljón króna í bætur vegna aðgerða og þvingunarráðstafana sem hann mátti sæta við rannsókn lögreglu á meintum brotum mannsins.
Málið hófst þann 16. janúar 2019 þegar lagðar voru tvær kröfur fram við Héraðsdóm Reykjaness á hendur manninum. Annarveg vegar að að fjarskiptafyrirtækjum yrði gert skylt að veita Lögreglunni á Suðurnesjum fjarskiptaupplýsingar tengdar símtækjum og númerum mannsins og hins vegar var óskað eftir heimild til eins mánaðar til að hlera síma mannsins og fylgjast með sms-sendingum.
Ástæðan var sú að maðurinn var grunaður um að tengjast innflutningi á fíkniefnum og því samþykkti Héraðsdómur Reykjaness áðurnefndar kröfur.
Síðar sama ár var maðurinn handtekinn og úrskurðaður í gæsluvarðhald vegna rannsóknar lögreglu á meintum kynferðis- og ofbeldisbrotum mannsins sem að auki tengdust vændi og mansali. Kemur fram að hin meintu brot hafi beinst gegn eiginkonu mannsins sem hafi lagt fram kæru gegn manninum.
Á meðan maðurinn var meðal annars vistaður í einangrun um tíma þá réðst lögreglan í umfangsmiklar aðgerðir, til að mynda húsleitir á nokkrum stöðum auk þess sem lagt var hald á farsíma, tölvur og ýmsan tölvubúnað í eigu mannsins.
Þrátt fyrir umfangmikla rannsókn var málið gegn manninum fellt niður í júní 2020.
Í kjölfarið höfðaði maðurinn mál gegn íslenska ríkinu og fór fram á rúmar 15 milljónir króna í miskabætur. Ástæðan var sú að rannsóknaraðgerðir lögreglu hafi verið óvenju umfangsmiklar auk þess sem að maðurinn hafi misst tekjur og að lokum atvinnu sína í kjölfar málsins
Lögmaður íslenska ríkið mótmælti kröfu mannsins og fullyrti meðal annars að maðurinn hafi sjálfur stuðlað að þeim aðgerðum sem lögregla réðst í. Þá væri það ósannað að maðurinn hafi verið rekinn úr starfi sínu vegna aðgerða lögreglu.
Héraðsdómur féllst á kröfu mannsins um miskabætur en komst að þeirri niðurstöðu að 1,5 milljón væri hæfileg upphæð. Byggðist það aðallega á því að ósannað væri að maðurinn hefði misst vinnu sína vegna aðgerða lögreglu.
