Tveir íslenskir leiðangrar eru nú að þvera Grænlandsjökul og vildi svo til að hóparnir hittust í dag. Um er að ræða átta manna hóp á vegum Vertu úti sem Vilborg Arna Gissurardóttir og Brynhildur Ólafsdóttir leiða, og svo sex manna hóp á vegum Arctic Hiking sem Einar Torfi Finnsson leiðir.

Hópur Arctic Hiking fer yfir jökulinn frá austri til vesturs en hópur Vertu úti fer frá vestri til austurs.

„Í dag hittust íslensku leiðangrarnir tveir á jöklinum og hafði leiðangur Vertu úti undirbúið sérstakt skemmtiatriði af því tilefni. Þaulæfða söng- og hringdanssýningu sem mikil natni og elja hefur farið í síðustu daga undir agaðri stjórn Sibylle Köll, leikstjóra leiðangursins. Okkur hefur ekki borist til eyrna tíðindi af fundinum en miðað við gps ferla beggja leiðangra virðist fundurinn ekki hafa staðið lengur en í klukkustund,“ segir á heimasíðu Vertu úti þar sem reglulega eru birtar fréttir úr ferðinni.

Sjá einnig: Íslenski hópurinn greinir frá „ólýsanlegum hryllingi“ á Grænlandsjökli

Þar segir einnig frá veðrinu og að í dag hafa það verið með besta móti. „Í gær var svo hlýtt þegar þau vöknuðu að þau þurftu næstum ekki að renna upp dúnúlpunni þegar tjöldin voru tekin niður. Dagarnir á undan hafa verið hrímkaldir og kaldasta nótt leiðangursins leið fyrir 2 dögum en þá sváfu allir í dúnúlpum og dúnbuxum ofan í dúnsvefnpokum.“

Hópur Arctic Hiking heldur úti Facebooksíðu þar sem fylgjast má með fréttum úr leiðangrinum. Hér má ennfremur fylgjast með fréttum frá þeim á ensku.

Í gær vildi svo til að einn úr hópnum, Ágúst Jóel Magnússon, fagnaði sextugsafmæli og þetta hafði verið undirbúið með því að taka með góðgæti sem neytt var í afmælisveislunni á jöklinum – súkkulaði og þurrkað kjöt, eða beef jerky.