Tveir jarðskjálftar við Kleifarvatn mældust í dag og annar þeirra fannst vel í byggð, meðal annars í Reykjavík. Var stærri skjálftinn 3,5 að stærð. Í tilkynningu frá náttúruvársérfræðingi Veðustofunnar kemur fram að jarðskjálftahrinur við Kleifarvatn eru vel þekktar:

„Jarðskjálftahrinur eru vel þekktar við Kleifarvatn en nokkrar slíkar hafa átt sér stað síðan að mælingar hófust. Stærsti skjálftinn sem hefur orðið við Kleifarvatn var árið 2000, en hann mælist 5,9 að stærð og var hann þann 17. júní kl 15:41, rétt eftir stóra Suðurlandsskjálftann. Frá árinu 1991 hafa sjö jarðskjálftar yfir 4 að stærð orðið við Kleifarvatn en þrír þeirra mældust 24. febrúar 2021 í upphafi hrinunnar á Reykjanesi sem leiddi af sér eldgosið í Geldingardölum. Frá áramótum hafa þrír skjálftar yfir 3 að stærð mælst við Kleifarvatn en tveir af þeim mældust í dag, sá stærri reyndist 3,5 að stærð. Veðurstofunni hafa borist margar tilkynningar um að þeir hafi fundist í byggð. Þess má geta að í fyrra mældust þar 26 skjálftar yfir 3 að stærð.

Á meðfylgjandi mynd má sjá skjálfta við Kleifarvatn sem hafa mælst yfir 3 að stærð síðan árið 1991.“