Austurríska knattspyrnusambandið neitar að hafa verið í sambandi við Ralf Ragnick, bráðabirgðaknattspyrnustjóra Manchester United, varðandi lausa landsliðsþjálfarastöðu hjá karlalandsliði sambandsins.
Sagt var frá því í austurrískum miðlum að Peter Schottel, yfirmaður knattspyrnumála hjá austurríska knattspyrnusambandinu hefði flogið til Manhcester í þeim erindagjörðum að kanna áhuga Ragnicks á þjálfarastöðunni.
Ragnick lætur af störfum sem bráðabirgðaknattspyrnustjóri Manchester United eftir yfirstandandi tímabil en áætlanir Manchester United gera ráð fyrir því að hann taki við ráðgjafastarfi hjá félaginu í kjölfarið.
Austurríska knattspyrnusambandið sá sig tilneytt til þess að gefa út yfirlýsingu á samfélagsmiðlum varðandi málið.
,,Það hefur enginn fundur átt sér stað milli Peter Schottel, yfirmanns knattspyrnumála og Ralf Ragnick, knattspyrnustjóra Manchester United.“
