Það má segja að allt hafi orðið vitlaust á samfélagsmiðlinum Twitter í gær eftir að tónlistarmaðurinn Svavar Knútur Kristinsson sakaði tvítuga konu um aldursfordóma vegna færslu sem móðir hennar birti um hana. Í færslunni sem um ræðir hafði móðir tvítugu konunnar spurt hvaða skemmtistaðir hentuðu hennar aldurshópi. Ástæðan fyrir spurningunni var sú að dóttir hennar hafði gefið henni langan lista af stöðum sem hún ætti að forðast sökum aldurs.
Hvert fer gamalt fólk á djammið?
Er með langa runu af stöðum frá tvítugri dóttur minni sem ég má ekki fara á— Dúa (@Dua1967) March 19, 2022
Þessi færsla fór öfugt ofan í Svavar Knút sem var allt annað en sáttur með það að dóttir þessarar ókunnugu konu hafi ráðlagt móður sinni að fara ekki á skemmtistaði sem eru aðallega stundaðir af yngra fólki. „Getur spurt tvítugu dóttur þína hvort hún myndi líta transfólk eða múslima sömu augum á skemmtistöðum eins og fólk sem hefur það eitt til sakar unnið að fylgja gangi náttúrunnar og eldast,“ skrifaði Svavar í athugasemd við færslu móðurinnar.
Getur spurt tvítugu dóttur þína hvort hún myndi líta transfólk eða múslima sömu augum á skemmtistöðum eins og fólk sem hefur það eitt til sakar unnið að fylgja gangi náttúrunnar og eldast. <3
— Svavar Knútur 🇺🇦 (@SvavarKnutur) March 19, 2022
Fjöldi fólk furðaði sig á þessari athugasemd Svavars. Einn netverji sagði til að mynda að ekki væri um fordóma að ræða og fordómar gegn transfólki og múslimum séu ekki sambærilegir þessu, það að fólk vilji djamma með jafnöldrum sínum sé bara fullkomlega eðlilegt. „Það er ekkert skrýtið að tvítugt fólk vilji bara djamma með jafnöldrum sínum, það eru ekki fordómar.“
Svavar stóð fastur á sínu þegar hann svaraði þessari athugasemd netverjans. „Bara þó þú upplifir það ekki sem fordóma, gerir það ekki að ekki fordómum,“ sagði hann. Þá sagði hann aldursfordóma vera raunverulega fordóma sem hafi áhrif, til dæmis á konur í tónlistarbransanum.
„En við erum ekki að tala um konur í bransanum,“ sagði netverjinn þá. „Það sem þú sagðir að væru fordómar er bara ekki rétt. Það að tvítugt fólk vilji ekki djamma með eldra fólki er galið að bera saman við transfóbíu og rasisma. Af hverju vilt þú svona mikið djamma með tvítugu fólki?“
Annar netverji spurði Svavar þá hvort hann væri virkilega að bera saman transfóbíu og rasisma við það að fólk vilji skemmta sér með jafnöldrum sínum. „Fordómar eru alls konar og aldrei hægt að leggja þá að jöfnu,“ sagði Svavar við því.
„Ef þér finnst óþægilegt að það sé potað í eitthvað samfélagslega normalíserað apartheid og „ugh! gamalt fólk!“ hugsunarhátt, þá er það ágætis upphafsstaður til sjálfsskoðunar. Það er alveg sárt þegar fólki er bent á að það sé ekki eins fordómalaust og það heldur. Svona líður líka kallaköllum þegar þeim er bent á casual kvenfyrirlitningu. Að hlaupa í vörn er eðlilegt fyrsta viðbragð.“
Konan sem birti upphaflegu færsluna svaraði Svavari eftir þessa athugasemd hans. „Segðu mér að þú sért að grínast. Að vilja fara af fullum þunga í umræðu um fordóma í djammtvíti?“
Þá útskýrði hún fyrir Svavari að það sé nú bara þannig að fólk á sama aldri hópist saman og skemmti sér. „Ég hef til dæmis lítinn áhuga á að skemmta mér með tvítugu fólki. Hefur ekkert með lífsskoðanir dóttur minnar eða meinta fordóma sem þú gefur í skyn. Hún er sennilega fordómalausasta manneskja sem ég hef kynnst.“
