Rússar settu þessar ásakanir fram án þess að leggja fram nokkrar handbærar sannanir fyrir þessum málflutningi. Psaki benti á að Kínverjar hefðu tekið undir þessar ásakanir. „Nú þegar Rússar hafa sett fram ósannar staðhæfingar, og Kínverjar virðast hafa tekið undir þær, þá ættum við öll að vera á varðbergi fyrir hugsanlegri notkun Rússa á efnavopnum í Úkraínu eða sviðsetningu atburða þar sem efnavopn verða notuð,“ skrifaði hún á Twitter.
Áður höfðu vestrænir embættismenn sagt að „ástæða sé til að hafa áhyggjur af hugsanlegri notkun óhefðbundinna vopna“ af hálfu Rússa en með því vísa þeir til notkunar efnavopna í stríðinu í Sýrlandi. Ástæðurnar fyrir þessu áhyggjum eru meðal annars sagðar vera að rússneska utanríkisráðuneytið hafi verið „að undirbúa jarðveginn“ með því að „setja fram rangar fullyrðingar“ um að Vesturlönd hafi unnið að þróun og framleiðslu efnavopna í Úkraínu.
Rússneska varnarmálaráðuneytið sakaði „úkraínska þjóðernissinna“ um að vera að undirbúa „ögrun“ með efnavopnum í þorpi norðvestan við Kharkiv og að ætlunin væri að ljúga því að Rússar hefðu beitt efnavopnum þar.
Psaki sagði í tísti sínu að Rússar eigi sér sögu um að saka Vesturlönd um þau brot sem Rússar fremji sjálfir: „Þetta er augljóst plott hjá Rússum til að réttlæta enn frekar ástæðulausa og óréttlætanlega árás á Úkraínu.“
