Sú staða sem uppi er varð til þess að í síðustu viku fylgdu bæði ríkin í kjölfar Úkraínu og sóttu um aðild að ESB. Bæði ríkin standa utan NATO og því er vel skiljanlegt að þau óttist nú næsta leik Pútín að mati Peter Viggo Jakobsen, dansks sérfræðings í varnarmálum.
Hann sagði í samtali við Ekstra Bladet að allt ráðist þetta af hvernig stríðið í Úkraínu endar en aðalvandamálið sé að ef ríki eru ekki meðlimir í NATO og falli þar með ekki undir 5. grein NATO-sáttmálans, eins og til dæmis Svíþjóð og Finnland, þá séu þau berskjölduð fyrir árás: „Það þýðir að bæði Moldóvía og Georgía eru nákvæmlega jafn berskjölduð og Úkraína og viðbrögð Vesturlanda myndu verða nákvæmlega þau sömu. Við myndum styðja þau á allan hugsanlegan hátt en ekki fara í stríð fyrir þau. Ekki einu sinni þótt þau gangi í ESB.“
Volodymyr Zelenskyy, forseti Úkraínu, segir að Rússar muni ekki láta staðar numið við Úkraínu. „Við erum í Evrópu, frjálsum stað. Þegar brotið er á mörkum frelsis og réttinda verðið þið að verja okkur. Því við erum bara fyrst í röðinni. Þið eruð næst,“ sagði hann í gær.
Jakobsen sagði að árás á Moldóvíu eða Georgíu sé hugsanlega það sem Pútín stefni á. Ef staðan þróist á þann hátt að Pútín telji það þjóna hagsmunum sínum að ráðast á ríkin þá muni Vesturlönd ekki getað hindrað hann í að gera það. Þess vegna sé mikil hætta á að Rússar ráðist á ríkin.
