Vladimir Pútín, forseti Rússlands, fyrirskipaði innrás í Úkraínu í nótt. Hófust þá umfangsmestu hernaðaraðgerðir gegn öðru ríki síðan í seinni heimsstyrjöld og marka þær upphaf stríðs í Evrópu. Síðan hernaðaraðgerðirnar hófust hafa fjölmargir íbúar Úkraínu undirbúið leið sína úr landinu.
Fréttablaðið ræddi í dag við Íslending sem búsettur er í Úkraínu ásamt eiginkonu sinni en. Íslendingurinn er þessa stundina staddur á Íslandi en eiginkona hans er í Úkraínu. „Konan mín hringdi í mig grátandi í alla nótt,“ segir Íslendingurinn í samtali sínu við Fréttablaðið.
Hann ætlar sér að fljúga til Úkraínu í nótt og bjarga eiginkonu sinni þaðan. Ferð hans er fyrst heitið til Moldóvu en þar ætlar hann að fá hjálp frá Utanríkisráðuneytinu við að komast þaðan til Úkraínu.
Foreldrar eiginkonu hans ætla hins vegar ekki að yfirgefa landið þrátt fyrir að þau séu búsett í borginni Dnipro en árás var gerð á þá borg í nótt. Íslendingurinn vildi ekki láta nafns síns getið í samtali við Fréttablaðið vegna skoðana tengdaforeldra sinna á stríðinu.
„Foreldrar hennar ætla að sitja heima hjá sér, kúltúrinn hjá þeim er þannig að Úkraína hefur alltaf verið í stríðum og styrjöldum. Foreldrar hennar eru búin að deila um þetta í fjölskyldunni – alltaf, þessa vestrænu stjórn og spyrja hvort að það hafi ekki verið betra að vera bara undir gamla tjaldinu, þau segjast hafa liðið betur þar.“
