Skýrslutakan sem fjórir blaðamenn hafa verið boðaðir til með réttarstöðu sakborninga tengist ekki umfjöllun þeirra um svokallaða skæruliðadeild Samherja. Þessu greinir RÚV frá og vitnar í Gunnar Inga Jóhannsson, lögmann Aðalsteins Kjartanssonar.

Blaðamennirnir fjórir eru Aðalsteinn Kjartansson blaðamaður Stundarinnar Þórður Snær Júlíusson ritstjóri Kjarnans, Þóra Arnórsdóttir ritstjóri Kveiks og Arnar Þór Ingólfsson blaðamaður Kjarnans. Þeir voru nýlega boðaðir til skýrslutöku hjá lögreglunni á Norðurlandi eystra og veitt staða sakbornings. Töldu margir að máli tengdist umfjöllun þeirra um skæruliðadeildina og um meinta notkun þeirra á gögnum sem hafi verið fengin úr stolnum síma. Nú er komið í ljós að málið tengist öðrum gögnum sem finna mátti á umræddum síma og tengist því umfjölluninni um Samherja ekki sem slíkt.

Sjá einnig: Blaðamenn í lögregluyfirheyrslu vegna síma Samherjaskipstjóra – Þóra Arnórsdóttir með stöðu sakbornings

Aðalsteinn Kjartansson ákvað að bera lögmæti ákvörðunar lögreglustjórans á Norðurlandi eystra, að boða blaðamennina í yfirheyrslu og veita þeim stöðu sakbornings, undir dómstóla. Lögmaður hans, Gunnar Ingi, sagði í samtali við RÚV að lögreglan hafi upplýsingar um hver hafi stolið síma af Páli Steingrímssyni, starfsmanni Samherja, en sá sé ekki blaðamaður og hafi engin tengsl við fjölmiðla.

„Það er því hægt að setja þá samsæriskenningu upp á hillu.“

Gunnar sagði að meint brot blaðamannanna gegn friðhelgi einkalífs tengist Samherja-málinu sem slíku á engan hátt. Hann segir að upplýsingar úr greinargerð lögreglustjórans hafi komið bæði honum og Aðalsteini í opna skjöldu og hafi sannarlega verið óvæntar.

Mál Aðalsteins verður tekið fyrir í Héraðsdóm Norðurlands eystra síðdegis í dag en þinghald verður lokað.

Sjá einnig:

Aðalsteinn lætur reyna á lögmæti ákvörðunar lögreglu – „Ég er ekki hafinn yfir lög“

Þóra Arnórsdóttir:„Ég hef engin lög brotið“