Reykjavik International Games fer fram í fimmtánda sinn dagana 29. janúar til 6. febrúar 2022. Það er Íþróttabandalag Reykjavíkur í samstarfi við sérsambönd ÍSÍ og íþróttafélögin í Reykjavík ásamt dyggum samstarfsaðilum sem standa að leikunum.

Reykjavik International Games er mikil íþróttahátíð þar sem keppt er í 15-20 einstaklingsíþróttagreinum. Flestir mótshlutarnir fara fram í Laugardalnum og nágrenni hans. Keppnin skiptist niður á tvær mótshelgar en einnig er ráðstefna hluti af dagskránni.

Hægt er að nálgast dagskrá leikanna hér auk upplýsinga um streymi á viðburðum og miðasölu. Í dag hefst keppni í borðtennis, júdó, sundi og keilu og skák en þetta er í fyrsta skipti sem hugaríþróttin verður hluti af leikunum.

„Það er mjög ánægjulegt að skák sé orðin hluti af Reykjavíkurleikunum og þetta er kærkomin viðbót í viðburðadagatal íslenskra skákmanna,“ segir Gunnar Björnsson, forseti Skáksamband Íslands.

Einstaklingskeppni hefst kl.13 í dag í Laugardalshöll og munu öflugir erlendur keppendur glíma við bestu skákmenn Íslands eins og stórmeistarana Hjörvar Stein Grétarsson og Jóhann Hjartarson.

Góð aðstaða verður fyrir áhorfendur og verður hægt að fylgjast með skákunum á risaskjá á staðnum. Auk þess sem skákmeistarinn Ingvar Þór Jóhannesson mun stýra beinni útsendingu á netinu fyrir áhugasama.

Á morgun, sunnudaginn 30. janúar, fer síðan fram fjögurra landa keppni milli Íslands, Noregs, Svíþjóðar og Danmerkur í beinni útsendingu á RÚV.