Heimamenn í Kamerún eru komnir áfram í 8-liða úrslit Afríkukeppninnar eftir nauman sigur á Kómoreyjum í kvöld.
Vinstri bakvörðurinn Chaker Alhadhur byrjaði í markinu hjá Kómoreyjum þar sem allir markverðir liðsins voru með kórónuveiruna.
Útlitið varð strax slæmt fyrir gestina þegar Nadjim Abdou, varnarmaður Kómoreyja. fékk beint rautt spjald fyrir ljóta tæklingu strax á 6. mínútu leiks. Karl Toko Ekambi kom Kamerún svo yfir á 29. mínútu með fyrsta skoti liðsins í leiknum og staðan 1-0 í hálfleik.
Alhadhur átti fínar markvörslur í seinni hálfleik en Kómóreyingar ógnuðu marki með skyndisóknum Kamerún þrátt fyrir að vera manni færri.
Vincent Aboubakar bætti við öðru marki fyrir Kamerún á 69. mínútu en Youssouf M’Changama minnkaði muninn í 2-1 með frábæru marki beint úr aukaspyrnu.
Lengra komust Kómoreyingar þó ekki og lokatölur 2-1 fyrir Kamerún sem mætir Gambíu í 8-liða úrslitunum 29. janúar.
