Hjá Real Madrid eru menn mjög bjartsýnir á að Kylian Mbappe muni ganga til liðs við félagið í sumar frá Paris Saint-Germain og að skiptin séu nokkurn veginn frágengin. Þetta segir í frétt ESPN.
Hinn 23 ára gamli Mbappe hefur verið stórkostlegur fyrir PSG frá komu sinni til félagsins árið 2017. Hann hefur skorað 151 mark og lagt upp önnur 76 í 198 leikjum fyrir Parísarliðið.
Mbappe hefur verið sterklega orðaður við Real Madrid síðan síðasta sumar. Spænska félagið bauð til að mynda um 200 milljónir evra í sóknarmanninn síðasta sumar. Því tilboði var hafnað af PSG þrátt fyrir að Mbappe hafi aðeins átt ár eftir af samningi sínum á þeim tímapunkti.
Samningur Mbappe rennur út í sumar og ætlar Real sér því að fá hann til liðs við sig á frjálsri sölu. Spænska félagið er jafnframt bjartsýnt á að klára samning við Mbappe áður en þessari leiktíð lýkur.
Það kemur einnig fram í fréttaskýringu ESPN að ef svo vildi til að Mbappe kæmi ekki til Real muni Madrídarfélagið snúa sér að annari stórstjörnu, eins og til dæmis Erling Braut Haaland.
