Björgunarsveitir komu örmagna manni, sem hafði verið á göngu í grennd við Keili, til hjálpar í dag. Þetta kemur fram í tilkynningu en þar segir að neyðarlínunni hafi verið gert viðvart um manninn um eittleytið í dag.

Maðurinn var norðvestur af Keili í hrauninu við Höskuldarvelli og hafði verið á göngu við annan mann frá því fyrr í dag þegar hann varð örmagna af þreytu, en að öðru leiti óslasaður.

Í tilkynningunni segir:

„Svæðið í kringum gönguleiðina að Keili er mjög gróft apalhraun og erfitt yfirferðar. Maðurinn var í lélegu símasambandi í grófu hrauninu og voru því skilyrði til leitar ekki með besta móti. Björgunarsveitarfólk hélt á svæðið úr tveimur áttum, hópar frá Grindavík, Vogum og Hafnarfirði. Rétt fyrir klukkan 15 voru mennirnir fundir þeim var komið fyrir í neyðarskýli og þeim gefin orka og hlúð að þeim örmagna. Maðurinn var óslasaður, orkulaus en að öðru leiti í ágætis ásigkomulagi. Búið var um hann í sjúkrabörum og hjóli komið undir þær, þar sem flytja þurfti hann 2 kílómetra leið að björgunarsveitarbíl.“

Þá segir að maðurinn sé nú kominn að björgunarsveitarbílnum sem eigi að flytja hann til byggða ásamt félaga sínum.