Elísa Viðarsdóttir hefur skrifað undir nýjan samning við Val út tímabilið 2022 en þetta staðfestir félagið í dag.

Íslenska landsliðskonan hefur undanfarið skoðað kosti sína erlendis en verður áfram á Hlíðarenda.

„Það er mikil ánægja að tilkynna að fyrirliðinn okkar hefur skrifað undir nýjan samning við Val. Elísa gekk til liðs við félagið fyrir tímabilið 2016 og hefur verið lykilleikmaður síðan þá. Hún átti frábært tímabil síðasta sumar þar sem hún leiddi liðið til sigurs á Íslandsmótinu;“ segir á vef Vals.

Búast má við að Elísa verði í stóru hlutverki með íslenska landsliðinu á Evrópumótinu í sumar sem fram fer á Englandi.