Aston Villa tók á móti Manchester United í lokaleik dagsins í ensku úrvalsdeildinni. Leiknum lauk með 2-2 jafntefli liðanna.
Gestirnir byrjuðu leikinn af krafti og kom Bruno Fernandes Manchester United yfir strax á 6. mínútu leiksins eftir gjöf frá Martinez, markmanni Aston Villa. Heimamenn náðu að vinna sig betur inn í leikinn þegar leið á en Manchester United leiddi með einu marki í hálfleik.
Bruno tvöfaldaði forystu Manchester United á 67. mínútu er Sanson gerði sig sekan um hræðilega sendingu til baka sem Fred komst inn í og gaf svo á Bruno sem kláraði af öryggi.
Stuttu síðar gerði Steven Gerrard breytingu á sínu liði og setti sinn fyrrum liðsfélaga, Philippe Coutinho, inn á völlinn. Það breytti gangi leiksins og minnkaði Jacob Ramsey muninn eftir flotta sókn heimamanna en Coutinho átti þátt í markinu. Brassinn knái skoraði svo sjálfur mark aðeins fimm mínútum síðar og jafnaði þar með metin.
Manchester United er í 7. sæti með 32 stig en Aston Villa er í 13. sæti með 23 stig.
Aston Villa 2 – 2 Manchester United
0-1 Bruno Fernandes (´6)
0-2 Bruno Fernandes (´67)
1-2 Jacob Ramsey (´77)
2-2 Philippe Coutinho (´82)
