„Skemmtið ykkur, en farið varlega,“ eru skilaboð bresku ríkisstjórnarinnar til ungmenna á leið á gott skrall um áramótin sem nú nálgast óðfluga. Gillian Keegan, einn aðstoðarheilbrigðisráðherra Bretlands, sagði að þeir sem væru á leið á mannamót ættu að huga að sínum persónulegu sóttvörnum og taka próf og reyna að skemmta sér sem mest utandyra.

Þrátt fyrir gríðarlega aukningu í Covid-19 smitum í Bretlanda undanfarnar vikur hefur aukningin ekki skilað sér í fjölgun innlagna. Raunar hefur mánaðarlegum innlögnum fækkað um 50% frá því í desember fyrir ári.

Frá þessu greinir Daily Mail nú í dag.

Helstu sérfræðingar Bretlandseyja í sóttvörnum hafa svo síðustu daga lýst yfir stuðningi við ákvörðun ríkisstjórnar Boris Johnson um að grípa ekki til herta aðgerða yfir jól og áramót. Hefur Daily Mail eftir Sir John Bell, prófessor í læknisfræði við Oxford háskóla og meðlimur í bólusetninganefnd breska ríkisins, sagði að almenningur hefði sýnt af sér „þokkalega ábyrgð,“ er kom að viðbrögðum við útbreiðslu Ómíkron afbrigðisins svokallaða.

Gillian Keegan sagði þá jafnframt við fjölmiðla í Bretlandi að stjórnvöld hefðu alltaf sent þau skilaboð út að fólk ætti að fara varlega og að engin breyting væri nú á því. „Farið varlega, farið í hraðpróf áður en þið farið út. Dveljið í vel loftræstum rýmum. Ég hef farið í nokkur samkvæmi utandyra, og fólk er að færa samkvæmi sín út,“ bætti ráðherrann við.

„Förum varlega,“ eru skilaboð ráðherrans og ríkisstjórnarinnar.

Mikill þrýstingur er nú á ríkisstjórn Boris Johnson að stytta einangrunarvist fyrir einkennalausa niður í fimm daga eftir að Bandaríkin riðu á vaðið með það í gær.