Héraðsdómur Reykjaness hefur birt pólskum manni fyrirkall og ákæru í Lögbirtingablaðinu. Maðurinn er fæddur árið 1989 og er með íslenska kennitölu en í þjóðskrá er hann sagður eiga heimili erlendis.
Manninum er gefið að sök að hafa þann 30. júlí árið 2020 staðið að innflutningi á samtals 271 töflum af ávana- og fíknilyfinu OxyContin 80 mg með flugi frá Gdansk í Póllandi. Í ákæru segir að maðurinn hafi falið lyfin í nærfatnaði sem hann klæddist.
Svo virðist sem maðurinn hafi flúið land einhvern tíma eftir að hann var látinn laus að loknum yfirheyrslum. Er þess krafist að hann verði dæmdur til refsingar og greiðslu alls sakarkostnaðar. Einnig er krafist upptöku á OxyContin-töflunum.
Málið verður tekið fyrir í Héraðsdómi Reykjaness þann 18. janúar 2022. „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það hann er ákærður fyrir og dómur verði lagður á málið að honum fjarstöddum. Birtingarfrestur er einn mánuður,“ segir í fyrirkallinu.
