Breski náriðillinn David Fuller, 67 ára, var í gær dæmdur í ævilangt fangelsi fyrir níðingsverk sín. Hann níddist kynferðislega á líkum að minnsta kosti 102 kvenna og stúlkna í líkhúsum sjúkrahúsa á Englandi. Hann myrti einnig tvær ungar konur, Wendy Knell og Caroline Pierce, árið 1987.

Independent segir að Fuller hafi fengið tvo lífstíðardóma fyrir morðin og 12 ára fangelsi að auki fyrir að hafa níðst á líkunum. Cheema-Grubb, dómari, sagði við dómsuppkvaðninguna: „Þú munt eyða hverjum einasta degi, sem þú átt ólifaðan, í fangelsi.“

Fuller var handtekinn á síðasta ári eftir að niðurstaða úr DNA-rannsókn lá fyrir en lögreglan var þá að rannsaka morðin tvö. Við húsleit heima hjá honum fann lögreglan myndefni af honum þar sem hann var að níðast á líkum í líkhúsum. Það hafði hann gert í rúman áratug þegar hann náðist.

Paul Fotheringham, yfirlögregluþjónn, sagði eftir dómsuppkvaðninguna að lögreglan væri nú að rannsaka óupplýst mannshvörf og hvort Fuller hafi komið við sögu í þeim.